पिंपरी चिंचवड, दि.२३ जून २०२५ – मनसे अध्यक्ष राज ठाकरे यांच्या वाढदिवसानिमित्त महाराष्ट्र नवनिर्माण सेना आणि रोजगार व स्वयंरोजगार विभाग, पुणे शहर यांच्या संयुक्त विद्यमाने दि .२५ जून रोजी “भव्य रोजगार व स्वयंरोजगारराभिमुख मेळावा” आयोजित करण्यात आला आहे. हा मेळावा भोसरी येथील अंकुशराव लांडगे सभागृह येथे पार पडणार आहे.
या मेळाव्याचे उद्घाटन “महाराष्ट्र नवनिर्माण विद्यार्थी सेनेचे अध्यक्ष अमित ठाकरे” यांच्या हस्ते होणार असून या मेळाव्यास मनसे नेते अनिल शिदोरे, बाबु वागस्कर, अॅड. गणेश सातपुते, अॅड. किशोर शिंदे, बाळा शेंडगे, हेमंत संभूस ,रणजित शिरोळे, अजय शिंदे, योगेश खैरे, पुणे शहर अध्यक्ष साईनाथ बाबर, पिंपरी चिंचवड शहर अध्यक्ष सचिन चिखले आदी उपस्थित राहणार आहेत.
५० नामांकित कंपन्यांचा सहभाग, २००० पेक्षा अधिक संधी
दिवसभर चालणार्‍या रोजगार मेळाव्यात ५० नामांकित कंपन्या सहभागी होणार असून, २००० पेक्षा जास्त नोकरीच्या संधी उपलब्ध आहेत. सहभागी कंपन्यांमध्ये Samsonite, Volkswagen, Spark Minda, Mahindra, Tata Group, ITC, यांसारख्या प्रतिष्ठित कंपन्यांचा समावेश आहे. संगणक, मेकॅनिकल, इलेक्ट्रिकल, इलेक्ट्रॉनिक्स व इतरही विविध शाखांतील उमेदवारांना भरपूर संधी या मेळाव्यात उपलब्ध होणार आहेत. पिंपरी-चिंचवड शहर व परिसरातील युवकांसाठी ही सुवर्णसंधी असून रोजगार स्थळावरच थेट मुलाखती घेतल्या जाणार असल्याची माहिती महेंद्र बैसाने यांनी दिली.
इच्छुक उमेदवारांनी आपल्या शैक्षणिक कागदपत्रांसह थेट मेळाव्यात सहभागी व्हावे, यासाठी कोणतेही शुल्क आकारले जाणार नाही, उमेदवारांनी क्यूआर कोड चा अथवा लिंकचा वापर करून आपला बायोडाटा अपलोड करुन सहभाग नोंदवावा,असे आवाहन राज्य उपाध्यक्ष महेश महाले यांनी केले आहे.
या उपक्रमाद्वारे मनसेने पिंपरी चिंचवड शहरातील युवकांसाठी रोजगाराच्या दिशेने एक सकारात्मक पाऊल उचलले असून, समाजातील बेरोजगारीच्या समस्येवर तोडगा काढण्याचा कृतिशील प्रयत्न केला जात असल्याचे मत सचिन चिखले यांनी मांडले.
कार्यक्रमासाठी महाराष्ट्र राज्य कौशल्य विकास संस्था, रोजगार, उद्योगता आणि नाविन्यता विभागाचे सहकार्य लाभले आहे. तर पुणे, पिंपरी चिंचवड परिसरातील विविध आयटीआय चे प्रमुख उपस्थितीत राहणार आहेत.
रोजगार व स्वयंरोजगार विभागाच्या सरचिटणीस सिद्धताई आंगणे यांच्यासह पिंपरी चिंचवड मनसे पदाधिकारी व कार्यकर्ते यासाठी व्यवस्थापन करीत आहेत.
