पिंपरी, पिंपरी-चिंचवडच्या राजकारणात महत्त्वाची घडामोड घडली असून भाजपचे माजी नगरसेवक संदीप वाघेरे यांनी भाजपला रामराम ठोकत राष्ट्रवादी काँग्रेस पक्षात प्रवेश केला. राज्याचे उपमुख्यमंत्री व पुणे जिल्ह्याचे पालकमंत्री अजित पवार यांच्या उपस्थितीत हा पक्षप्रवेश पार पडला. यावेळी राष्ट्रवादी काँग्रेसचे निवडणूक प्रचार प्रमुख विठ्ठल ऊर्फ नाना काटे उपस्थित होते.
पक्षप्रवेशानंतर बोलताना संदीप वाघेरे यांनी भाजपमधील अनुभवांवर स्पष्ट शब्दांत नाराजी व्यक्त केली. २०१७ च्या महापालिका निवडणुकीत राष्ट्रवादीचा बालेकिल्ला समजल्या जाणाऱ्या पिंपरी प्रभाग क्रमांक २१ मधून भाजपकडून विक्रमी मतांनी विजय मिळवूनही पक्षातील शहर नेतृत्वाने मला पाच वर्षे कोणतीही जबाबदारी दिली नाही, असा आरोप त्यांनी केला.
पक्षाशी निष्ठा राखूनही जाणीवपूर्वक दुर्लक्ष करण्यात आल्याचे त्यांनी सांगितले. अलीकडेच पार पडलेल्या पक्षप्रवेश कार्यक्रमात प्रभागातील पारंपरिक विरोधकांना पक्षात घेतले गेले. ज्या नावांना आम्ही ठाम विरोध केला होता, त्यांनाच मानाचे स्थान देण्यात आले. हे राजकीयदृष्ट्या अस्वस्थ करणारे होते, असे वाघेरे म्हणाले.
या संदर्भात शहरातील भाजपच्या आमदारांशी चर्चा करूनही शेवटच्या क्षणी भूमिका बदलण्यात आल्याने आपला विश्वास डळमळीत झाला, असे त्यांनी नमूद केले. आम्हाला कोणतीही कल्पना न देता प्रवेश घडवून आणण्यात आले. हा विश्वासघात होता, अशी थेट प्रतिक्रिया त्यांनी व्यक्त केली.
यानंतर आपल्या सहकाऱ्यांशी सविस्तर चर्चा करून राष्ट्रवादी काँग्रेसमध्ये प्रवेश करण्याचा निर्णय घेतल्याचे त्यांनी सांगितले. अजित पवार यांचे कार्यक्षम नेतृत्व, संघटनात्मक ताकद आणि विकासाभिमुख धोरण पाहता राष्ट्रवादी काँग्रेस हा योग्य पर्याय असल्याचा विश्वास निर्माण झाला, असे वाघेरे यांनी स्पष्ट केले.
आगामी पिंपरी-चिंचवड महापालिका निवडणुकीबाबत बोलताना त्यांनी सांगितले की, पिंपरी प्रभाग क्रमांक २१ मधील चारही जागांवर राष्ट्रवादी काँग्रेसचे उमेदवार निवडून आणण्यासाठी आम्ही पूर्ण ताकदीने मैदानात उतरणार आहोत. अजितदादांच्या नेतृत्वाखाली पुन्हा एकदा महापालिकेवर राष्ट्रवादीची सत्ता येईल, असा विश्वास त्यांनी व्यक्त केला.
