पिंपरी, पिंपरी-चिंचवड महानगरपालिकेचे माजी उपमहापौर आणि माजी स्थायी समिती सभापती हिरानंद उर्फ डब्बू आसवानी यांच्या नेतृत्वाखाली, शहरात रविवारी, दिनांक १४ डिसेंबर २०२५ रोजी ‘हॅपिनेस स्ट्रीट २.०’ या भव्य कार्यक्रमाचे यशस्वी आयोजन करण्यात आले. या आनंददायी उपक्रमाला शहरातील हजारो नागरिकांनी उपस्थिती लावत प्रचंड उत्साह दाखवला. हा कार्यक्रम केवळ मनोरंजनाचे साधन नसून सामाजिक बांधिलकीचे प्रतीक ठरला.
कार्यक्रमाचे प्रमुख वैशिष्ट्य म्हणजे, ज्या दांपत्यांनी त्यांच्या सुखी वैवाहिक जीवनाची २५ वर्षे पूर्ण केली आहेत, त्यांचा या व्यासपीठावर रौप्यमहोत्सवी सत्कार करण्यात आला. या खास कार्यक्रमामुळे या जोडप्यांच्या चेहऱ्यावर आनंदाचे भाव तरळले. त्याचबरोबर, शहराची जीवनवाहिनी सुरळीत ठेवणाऱ्या आणि दररोज अविरत कष्ट करणाऱ्या महापालिकेचे सफाई कामगार आणि ड्रेनेज विभागाचे कर्मचारी यांच्या योगदानाची विशेष दखल घेण्यात आली. त्यांच्यासाठी खास सत्कार समारंभ आयोजित करून त्यांना भेटवस्तू देऊन सन्मानित करण्यात आले. नागरिकांनी टाळ्यांच्या कडकडाटात या कर्मचाऱ्यांप्रती कृतज्ञता व्यक्त केली, ज्यामुळे उपस्थितांमध्ये सकारात्मक उत्साहाचे वातावरण निर्माण झाले.
योग, झुम्बा आणि सायकलिंगसारख्या आरोग्य आणि फिटनेसशी संबंधित उपक्रमांनी नागरिकांना शारीरिक आणि मानसिकरित्या ताजेतवाने केले. ‘हॅपिनेस स्ट्रीट २.०’ मध्ये एकूण ४० हून अधिक ऍक्टिव्हिटीजचा समावेश होता, तसेच १०० पेक्षा जास्त गिफ्ट्सचे वाटप करण्यात आले. याशिवाय, धमाकेदार लाईव्ह शोजने उपस्थितांचे मनोरंजन केले. या सर्व अभिनव उपक्रमांमुळे ‘हॅपिनेस स्ट्रीट २.०’ पिंपरी-चिंचवडकरांसाठी एक अविस्मरणीय अनुभव ठरला.
