पिंपरी-चिंचवड, ८ जुलै २०२५ – पवना धरण सध्या ७७.५४% क्षमतेने भरले असून, पाणलोट क्षेत्रात सुरू असलेल्या पावसामुळे धरणात येवा वाढत आहे. सकाळी ८ वाजता प्राप्त आकडेवारीनुसार धरणातील पाणीसाठा नियंत्रित करण्यासाठी सांडव्याद्वारे पवना नदीपात्रात २८०० क्युसेक्स पाण्याचा नियंत्रीत विसर्ग सुरू करण्यात आला आहे, अशी माहिती खडकवासला पाटबंधारे विभागाच्या पवना धरण पूरनियंत्रण कक्षाने दिली आहे.
पावसाच्या तीव्रतेनुसार विसर्गाचा हा वेग कमी किंवा अधिक केला जाऊ शकतो. त्यामुळे नदीकाठच्या नागरिकांना सतर्क राहण्याचे आवाहन करण्यात आले आहे. नदीपात्रात कोणीही उतरू नये, तसेच शेती अवजारे, पंप, जनावरे आदी तत्काळ सुरक्षित स्थळी हलवावीत, अशी सूचना करण्यात आली आहे.
सखल भागातील नागरिकांना तातडीने माहिती देण्यात यावी आणि सर्वांनी खबरदारी बाळगून प्रशासनास सहकार्य करावे, असे आवाहन पूरनियंत्रण कक्षाने केले आहे.
