पिंपळे गुरव, परिसरातील काटेपुरम चौकात आज दुपारी वडाचे झाड कोसळून स्विफ्ट डिझायर (क्रमांक MH 12 MN 9068) कारवर आदळले. या घटनेत कारचे मोठे नुकसान झाले असून सुदैवाने कोणतीही जीवितहानी झालेली नाही.
झाड कोसळल्याने परिसरात काही काळ मोठ्या प्रमाणात वाहतूक कोंडी झाली. स्थानिक नागरिकांनी तत्परतेने वाहतूक सुरळीत करण्यासाठी प्रयत्न केले आणि रस्ता मोकळा केला.
घटनेनंतर नागरिकांनी पिंपरी चिंचवड महापालिकेकडे झाडांच्या सुरक्षिततेबाबत गंभीर चिंता व्यक्त केली आहे. शहरातील जुनी व जीर्ण झाडे तातडीने हटवावीत, त्यांचे ऑडिट करून योग्य उपाययोजना कराव्यात, अशी मागणी नागरिकांकडून करण्यात आली आहे. तसेच, अशा ठिकाणी नव्याने वृक्षारोपण करून हरितावरण टिकवण्याची सूचना देखील देण्यात आली आहे.
