पिंपरी , पिंपरी प्रभाग क्रमांक २१ मधील ज्येष्ठ नागरिक संस्थेच्या सभागृहामध्ये ग्रामस्थांच्या वतीने महाराष्ट्र राज्याचे दिवंगत उपमुख्यमंत्री अजितदादा पवार यांच्या दुःखद निधनाबद्दल शोकसभेचे आयोजन करण्यात आले. यावेळी उपस्थितांनी त्यांच्या प्रतिमेस पुष्पहार अर्पण करून भावपूर्ण श्रद्धांजली वाहिली.
शोकसभेत नगरसेवक संदीप वाघेरे यांनी आपल्या मनोगतात दिवंगत उपमुख्यमंत्री अजितदादा पवार यांनी पिंपरी-चिंचवड शहराच्या सर्वांगीण विकासासाठी केलेल्या कार्याचा आढावा घेतला. शहरातील पायाभूत सुविधा, औद्योगिक विकास, शिक्षण, आरोग्य तसेच सर्वसामान्य नागरिकांच्या प्रश्नांबाबत त्यांनी नेहमीच सकारात्मक आणि दूरदृष्टीची भूमिका घेतल्याचे वाघेरे यांनी नमूद केले.
पिंपरी-चिंचवड शहराच्या प्रगतीमध्ये अजितदादा पवार यांचे योगदान अत्यंत मोलाचे असून त्यांचे कार्य सदैव स्मरणात राहील, अशा भावना त्यांनी व्यक्त केल्या. त्यांच्या जाण्याने राज्याने एक अनुभवी, सक्षम आणि दूरदृष्टी असलेले नेतृत्व गमावल्याची खंतही यावेळी व्यक्त करण्यात आली.
या शोकसभेस नगरसेवक हिरानंद आसवानी, निकिता कदम, प्रियांका कुदळे, गिरिजा देवी कुदळे, दीपिका कापसे, ज्येष्ठ नागरिक संस्थेचे अध्यक्ष वसंत तावरे, सुधाकर यादव, स्वामी सर, कैलास भुजबळ तसेच सामाजिक कार्यकर्ते शेखर अहिरराव, राजेंद्र वाघेरे, किशोर येळवंडे, राकेश मोरे आदी मान्यवर उपस्थित होते.
