वाकड, नोकरी, फर्निचरसाठी पैशांची मागणी करत मूलबाळ होत नसल्याच्या कारणावरून वाकड येथे एका विवाहितेचा शारीरिक आणि मानसिक छळ करून तिला आत्महत्येसाठी प्रवृत्त केल्याची घटना समोर आली आहे. ही घटना १८ ऑगस्ट रोजी वाकड येथे घडली.
देवेंद्र भाऊसाहेब खैरनार (२६, मोहाडी, धुळे) यांनी या प्रकरणी वाकड पोलीस ठाण्यात फिर्याद दिली आहे. दिव्या सूर्यवंशी असे आत्महत्या केलेल्या विवाहितेचे नाव आहे. दिव्या हिचा पती हर्षल शांताराम सूर्यवंशी (३३, वाकड) आणि सासरा शांताराम उत्तम सूर्यवंशी (६०, वाकड) यांना अटक करण्यात आली आहे. या प्रकरणात सासू, दीर योगेश शांताराम सूर्यवंशी (४०, आंबेगाव) आणि नणंद यांच्या विरोधातही गुन्हा दाखल करण्यात आला आहे.
आरोपींनी संगनमत करून दिव्या सूर्यवंशीला नोकरी लागत नाही, माहेरहून फर्निचरसाठी पैसे आणत नाही आणि लग्न झाल्यापासून मूलबाळ झाले नाही या कारणांवरून वेळोवेळी मारहाण केली आणि तिचा छळ केला. या त्रासाला कंटाळून तिने १८ ऑगस्ट रोजी वाकड येथील घरात गळफास घेऊन आत्महत्या केली. वाकड पोलीस तपास करत आहेत.
