कोल्हापूर- प्रतिनिधी, दारूच्या व्यसनातून होणारा कौटुंबिक छळ, चारित्र्यावर संशय आणि वारंवार होणाऱ्या मारहाणीमुळे २६ वर्षीय विवाहितेने आत्महत्या केल्याची धक्कादायक घटना कांडगाव (ता. करवीर) येथे उघडकीस आली आहे. या प्रकरणी मृत विवाहितेच्या आईने करवीर पोलिस ठाण्यात सविस्तर तक्रार दिली असून पती, सासरे आणि सासू यांच्याविरोधात चौकशी सुरू करण्यात आली आहे.
प्राप्त माहितीनुसार, प्रतीक्षा तुषार कांबळे (वय २६) हिचा विवाह ०४ मार्च २०१९ रोजी तुषार सारंग कांबळे याच्याशी प्रेमविवाह झाला होता. लग्नानंतर सुरुवातीची दोन वर्षे संसार सुरळीत सुरू होता. त्यानंतर पती तुषार याला दारूचे व्यसन लागल्याने तो वारंवार दारू पिऊन घरी येऊन प्रतीक्षाला मानसिक व शारीरिक त्रास देत असल्याचा आरोप तिच्या आईने केला आहे.
प्रतीक्षा ही परिचारिका म्हणून काम करत होती. नोकरीवर जाण्यावरून तसेच चारित्र्यावर संशय घेत पतीकडून मारहाण व शिवीगाळ केली जात होती. आर्थिक अडचणीमुळे तिने पुन्हा नोकरी सुरू केली असतानाही छळ सुरूच असल्याचे तक्रारीत नमूद आहे. सासरच्या मंडळींकडून घरकामासाठी दबाव टाकण्यात येत असल्याचाही आरोप करण्यात आला आहे.
या सततच्या छळाला कंटाळून ०६ जानेवारी २०२६ रोजी सकाळी कांडगाव येथील राहत्या घरी प्रतीक्षाने नायलॉन दोरीने गळफास घेऊन आत्महत्या केल्याचे समोर आले. घटनेनंतर मृतदेह सीपीआर रुग्णालय, कोल्हापूर येथे नेण्यात आला असून शवविच्छेदन अहवालानुसार मृत्यू गळफासामुळे झाल्याचे डॉक्टरांनी स्पष्ट केले आहे.
या प्रकरणी मृत विवाहितेची आई सौ. सुनीता भीमराव कांबळे यांनी ०७ जानेवारी २०२६ रोजी करवीर पोलिस ठाण्यात सविस्तर निवेदन दिले आहे. पोलिसांनी गुन्हा नोंदवण्याची प्रक्रिया सुरू केली असून पोस्टमार्टम अहवालाच्या आधारे पुढील कायदेशीर कारवाई करण्यात येणार असल्याचे पोलिसांनी सांगितले.
