काळेवाडी, घर विकून पैसे आणून देण्याच्या कारणावरून एका पतीने आपल्या पत्नीला जीवे मारण्याचा प्रयत्न केल्याची धक्कादायक घटना उघडकीस आली आहे. ही घटना गुरुवारी (१८ डिसेंबर) रात्री १० वाजण्याच्या सुमारास अमरदिप कॉलनी, ज्योतीबा नगर, काळेवाडी येथे घडली.
या प्रकरणात एका महिला फिर्यादीने काळेवाडी पोलीस ठाण्यात फिर्याद दिली आहे. त्यानुसार संदेश लाजरस चोपडे (अमरदिप कॉलनी, जोतीबानगर, काळेवाडी, पुणे) याच्या विरोधात गुन्हा दाखल करण्यात आला आहे.
आरोपीने आपल्या पत्नीला तिच्या आईचे घर विकून पैसे आणून देण्यास सांगितले होते. पत्नीने नकार दिल्याने आरोपीने तिला शिवीगाळ करत लाथाबुक्क्यांनी आणि कमरेच्या पट्ट्याने बेदम मारहाण केली. त्यानंतर जीवे मारण्याच्या उद्देशाने घरातील मोठ्या कुलूपाने पत्नीच्या डोक्यात ठिकठिकाणी वार करून तिला गंभीर जखमी केले. पोलिसांनी संदेश याला अटक केली आहे. काळेवाडी पोलीस तपास करत आहेत.
