थेरगाव : अखिल थेरगाव नवरात्र उत्सवात शनिवारी देवीची आरती आमदार शंकर जगताप यांच्या हस्ते संपन्न झाली. त्यांनी आयोजक करिश्मा बारणे यांच्या प्रयत्नांचे कौतुक करत उत्सवाला शुभेच्छा दिल्या.
पावसाच्या सरींमध्येही कै. मोरे महादु बारणे क्रीडांगण, वनदेवनगर , थेरगाव येथे आयोजित दांडिया-रास गरबा नाईट्समध्ये पारंपरिक पोशाखात तरुणाईने उत्स्फूर्त सहभाग नोंदवला. यावेळी थेरगाव येथील युवा माजी नगरसेवक अभिषेक बारणे यांच्यासह परिसरातील मोठ्या संख्येने नागरिक उपस्थित होते.
यावेळी आमदार शंकर जगताप म्हणाले, “पावसाच्या सरी कोसळत होत्या, पण थेरगावच्या दांडिया-गरब्याचा जल्लोष क्षणभरही थांबला नाही. खरं तर पावसाचा थेंब-थेंब जणू गरब्याच्या तालाला साथ देत होता. तरुणाईने जी उत्स्फूर्त भागीदारी केली, त्यातून नवरात्री म्हणजे श्रद्धा, संस्कृती आणि आनंद यांचा संगम आहे हे प्रकर्षाने दिसून आले. पाऊस आला तरी उत्सवाचा रंग अजून गडद झाला, हे लोकांच्या संस्कृतीवरील प्रेमाचे जिवंत उदाहरण आहे.”
रंगीबेरंगी पोशाख, दांडियाचे थिरकते ताल आणि गरब्याच्या लयींनी थेरगावचे वातावरण दुमदुमून गेले. प्रत्येक रात्रीच्या स्पर्धांमध्ये विजेत्यांना मोबाईल फोन, स्मार्टवॉच, हेडफोन्स, मानाची पैठणी आणि लहानग्यांसाठी आकर्षक दांडिया बक्षिसे देऊन गौरविण्यात आले.
