पिंपरी चिंचवड महापालिकेच्या वतीने करण्यात आला सन्मान
पिंपरी, पिंपरी चिंचवड महानगरपालिकेच्या सुरक्षा विभागात प्रदीर्घ काळ सेवा बजावणारे सुरक्षा कर्मचारी सुभाष जाधव आज सेवानिवृत्त झाले. त्यांच्या सेवानिवृत्तीनिमित्त पिंपरी येथील आचार्य अत्रे रंगमंदिर येथे महापालिकेच्या वतीने त्यांचा सन्मान करण्यात आला. यावेळी महापालिका अधिकारी, कर्मचारी आणि सुभाष जाधव यांचे कुटुंबीय उपस्थित होते.
सुभाष जाधव यांनी महापालिकेच्या सेवेत रुजू होण्यापूर्वी भारतीय सैन्य दलात सेवा बजावली आहे. देशसेवेनंतर त्यांनी पिंपरी चिंचवड महानगरपालिकेच्या सुरक्षा विभागात प्रवेश केला. महापालिका सेवेतही त्यांनी सोपविण्यात आलेली जबाबदारी प्रामाणिकपणे आणि कर्तव्यनिष्ठेने पार पाडली.
हसतमुख आणि मनमिळावू स्वभावामुळे जाधव यांनी सहकाऱ्यांमध्ये आपले वेगळे स्थान निर्माण केले होते. त्यांच्या सेवानिवृत्तीच्या निमित्ताने सहकाऱ्यांनी त्यांच्या कार्याचा गौरव करत पुढील वाटचालीसाठी शुभेच्छा दिल्या.
यावेळी भावना व्यक्त करताना सुभाष जाधव म्हणाले, “आपले काम प्रामाणिकपणे करणे आवश्यक असते. माझ्या सेवाकाळात हे तत्त्व पाळण्याचा मी प्रयत्न केला. महापालिकेत काम करत असताना सहकारी आणि वरिष्ठांचे सहकार्य नेहमी मिळाले. यामध्ये कुटुंबीयांची साथ देखील मिळाली. यापुढील काळात कुटुंबासोबत वेळ घालवण्याबरोबरच नाविन्यपूर्ण छंद जोपासण्याचा तसेच पर्यटन करण्याचा माझा मानस आहे.”
वयाच्या अवघ्या साडेसतरा वर्षी भारतीय सैन्य दलात भरती झाल्यानंतर २० वर्षे सैन्यदलात देशाची सेवा बजावली. त्यानंतर महापालिकेत त्यांनी सुरक्षा विभागामध्ये २२ वर्षे प्रदीर्घ सेवा बजावली. त्यांच्या या कार्याचा गौरव करून यावेळी त्यांना उप आयुक्त संदीप खोत, विशेष अधिकारी किरण गायकवाड, जनता संपर्क अधिकारी प्रफुल्ल पुराणिक यांच्या हस्ते सन्मानचिन्ह देण्यात आले. त्यांच्या निवृत्तीनंतरच्या आयुष्यासाठी महापालिका अधिकारी व कर्मचाऱ्यांनी त्यांना शुभेच्छा देखील दिल्या.#pimprichinchwadmunicipalcorporation #subhashjadhavretirment #pcmc #sibhashjadhav #twincitynews
