राहुल कलाटे यांच्या पुढाकाराने ‘सेवा संकल्प अभियान’; शेकडो नागरिकांनी घेतला लाभ
वाकड : पंतप्रधान नरेंद्र मोदी यांच्या वाढदिवसानिमित्त ‘सेवा संकल्प अभियान’ अंतर्गत वाकडमधील म्हातोबा नगर परिसरात मोफत आरोग्य तपासणी शिबिराचे आयोजन करण्यात आले. नगरसेवक राहुल कलाटे आणि समर्थ युवा फाऊंडेशन यांच्या संयुक्त विद्यमाने झालेल्या या शिबिराला नागरिकांचा उत्स्फूर्त प्रतिसाद मिळाला.
शिबिरात मॅमोग्राफीद्वारे स्तनाच्या कर्करोगाची तपासणी, CBC रक्त तपासणी, रक्तदाब, रक्तातील साखर, कोलेस्ट्रॉल तसेच डोळ्यांची तपासणी करण्यात आली. गरजू नागरिकांना मोफत चष्म्यांचे वाटपही करण्यात आले. एकाच दिवसात शेकडो नागरिकांनी विविध आरोग्य तपासण्यांचा लाभ घेतला.
नगरसेवक राहुल कलाटे यांनी शिबिराला भेट देत नागरिकांशी संवाद साधला. तसेच ज्येष्ठ नागरिकांच्या आरोग्याची आस्थेने विचारपूस केली. नागरिकांच्या आरोग्याशी संबंधित समस्या जाणून घेत भविष्यातही परिसरात अशा आरोग्यविषयक उपक्रमांचे आयोजन करण्यासाठी प्रयत्नशील राहणार असल्याचे त्यांनी सांगितले.
“सेवा हीच साधना आणि समाजहित हाच संकल्प या भावनेतून ‘सेवा संकल्प अभियान’ राबविण्यात येत आहे. नागरिकांना वेळेवर आणि आवश्यक आरोग्य तपासण्या उपलब्ध व्हाव्यात, हा या उपक्रमाचा मुख्य उद्देश आहे. विशेषतः ज्येष्ठ नागरिकांनी मोठ्या संख्येने शिबिराचा लाभ घेतला, ही समाधानाची बाब आहे,” असे राहुल कलाटे यांनी सांगितले.
या उपक्रमासाठी सहकार्य केल्याबद्दल समर्थ युवा फाऊंडेशनचे अध्यक्ष आणि भाजपा प्रदेश सरचिटणीस राजेश पांडे यांचे राहुल कलाटे यांनी आभार मानले. आरोग्य शिबिराच्या आयोजनाबद्दल नागरिकांनीही समाधान व्यक्त केले.
