जवळपास ४ कोटींच्या फसवणुकीची तक्रार; संबंधित कंपन्यांचीही सखोल चौकशी करण्याचे आदेश
पुणे, दि. २९ ऑगस्ट २६: नोकरी मिळवून देण्याच्या नावाखाली विद्यार्थ्यांकडून लाखो रुपये घेतल्याचा आरोप असलेल्या Radiant IT Consultancy प्रकरणाला गंभीर वळण मिळाले आहे. जवळपास चार कोटी रुपयांची आर्थिक फसवणूक झाल्याची तक्रार असून, कंपन्यांचीही चौकशी करण्याची मागणी करण्यात आली आहे. पुणे पोलीस आयुक्त अमितेश कुमार यांनी संबंधित अधिकाऱ्यांना तपास व कारवाईच्या सूचना दिल्या आहेत.
भाजप युवा मोर्चा, महाराष्ट्र प्रदेश अध्यक्ष कृष्णराज महाडीक यांच्या मार्गदर्शनाखाली सामाजिक कार्यकर्ते ओंकार शिवाजी तुपे यांनी निवेदन दिले. Radiant IT Consultancyकडून फ्रेशर्स विद्यार्थ्यांना नोकरी मिळवून देण्याचे सांगून काही विद्यार्थ्यांकडून चार लाख, तर काहींकडून आठ लाख रुपयांपर्यंत रक्कम घेतल्याचा आरोप आहे.
रक्कम घेतल्यानंतर विद्यार्थ्यांना Caryanam India, Cybromatic, GTastrix, Accure Softtech, Lean Quality IT Services आणि Whitetable Technology या कंपन्यांमध्ये नोकरीसाठी पाठवण्यात आल्याचे निवेदनात नमूद आहे. मात्र, काम करून घेतल्यानंतर अपेक्षित वेतन देण्यात नसल्याच्या तक्रारी आहेत. काही विद्यार्थ्यांचे १० ते १२ महिन्यांचे वेतन थकीत असल्याचा दावा आहे. काही विद्यार्थ्यांकडून दोन ते तीन महिने काम करून घेतल्यानंतर त्यांना कामावरून कमी करण्यात आल्याचीही तक्रार आहे.
या प्रकरणातील बँक व्यवहार, ई-मेल, मेसेज आणि अन्य पुरावे पोलिसांकडे सादर करण्यात आले आहेत. Radiant IT Consultancyचे संचालक सैफ मनियार यांच्यावर यापूर्वीच कारवाई करून त्यांना अटक करण्यात आली आहे. संबंधित कंपन्यांची चौकशी करून दोषी आढळणाऱ्यांवर कायदेशीर कारवाई करावी, अशी मागणी करण्यात आली आहे.
दरम्यान, Mind Technology, City Vista, खराडी येथील प्रकरणातही जवळपास ८० विद्यार्थ्यांची फसवणूक झाल्याची तक्रार आहे. या प्रकरणाचीही चौकशी करून न्याय मिळवून द्यावा, अशी मागणी करण्यात आली आहे.
विद्यार्थ्यांच्या भवितव्याचा प्रश्न लक्षात घेऊन कृष्णराज महाडीक यांच्या मार्गदर्शनाखाली लवकरच रोजगार मेळाव्याचे आयोजन करण्यात येणार आहे. विद्यार्थ्यांना न्याय आणि रोजगार मिळवून देण्यासाठी ओंकार शिवाजी तुपे यांचा पाठपुरावा सुरू राहणार असल्याचे सांगण्यात आले.
