पिंपरी चिंचवड : पिंपरी–चिंचवड महानगरपालिका सार्वत्रिक निवडणुकीच्या पार्श्वभूमीवर प्रभाग क्रमांक १३ मधून महाराष्ट्र नवनिर्माण सेनेच्या अधिकृत उमेदवारांनी आज उत्साहात उमेदवारी अर्ज दाखल केला. यामध्ये सचिन चिखले, अश्विनी चिखले आणि शशिकिरण गवळी यांचा समावेश आहे. अर्ज दाखल करताना कार्यकर्ते, पदाधिकारी व समर्थकांची मोठी उपस्थिती पाहायला मिळाली.
मनसेकडून अ-गट (अनुसूचित जाती) मधून शशिकिरण पंढरीनाथ गवळी, क-गट (सर्वसाधारण महिला) मधून अश्विनी सचिन चिखले आणि ड-गट (सर्वसाधारण पुरुष) मधून सचिन तुकाराम चिखले हे उमेदवार निवडणूक रिंगणात उतरले आहेत.
यावेळी बोलताना सचिन चिखले म्हणाले की, पक्षाने आणि जनतेने दाखवलेला विश्वास हा आमच्यासाठी मोठी जबाबदारी आहे. जनतेच्या आशीर्वादातूनच प्रभागाच्या विकासाचा नवा अध्याय लिहिण्याचा आमचा संकल्प असून पायाभूत सुविधा, नागरिकांच्या मूलभूत प्रश्नांवर प्राधान्याने काम केले जाईल, असा विश्वास त्यांनी व्यक्त केला.
गेल्या अनेक वर्षांपासून नागरिकांनी दिलेले प्रेम, पाठबळ आणि सहकार्य यामुळेच आजपर्यंत समाजसेवेचे कार्य शक्य झाले आहे. हेच सहकार्य भविष्यातही कायम राहील, असा विश्वास व्यक्त करत पुन्हा एकदा सेवा करण्याची संधी द्यावी, असे आवाहन त्यांनी मतदारांना केले.
मनसेच्या ‘रेल्वे इंजिन’ या निवडणूक चिन्हासमोरील बटन दाबून प्रचंड बहुमताने विजयी करण्याचे आवाहन उमेदवारांनी केले.
