पिंपरी : पिंपरी–चिंचवड शहरातील वाहतूक कोंडी कमी करण्यासाठी महत्त्वाच्या मानल्या जाणाऱ्या निगडी–दापोडी रस्त्यावरील पिंपरी डेअरी फार्मसमोरील हलक्या वाहनांसाठीच्या भुयारी मार्गाच्या उभारणीला लवकरच गती मिळण्याची चिन्हे दिसत आहेत. नगरसेवक संदीप वाघेरे यांनी महापालिका आयुक्तांची प्रत्यक्ष भेट घेऊन या प्रकल्पाची निविदा प्रक्रिया तातडीने सुरू करण्याची मागणी केल्यानंतर हालचाली वेगाने सुरू झाल्या आहेत.
पिंपरी येथील LC गेट क्रमांक ६० वर उभारण्यात येत असलेला चार पदरी रेल्वे उड्डाणपूल अंतिम टप्प्यात असून लवकरच तो नागरिकांसाठी खुला होणार आहे. मात्र, उड्डाणपूलावरून येणाऱ्या वाहनांना पुणे–मुंबई महामार्ग ओलांडण्यासाठी मोठा वळसा घ्यावा लागत असल्याने वाहतूक कोंडीची समस्या निर्माण होत आहे. ही अडचण दूर करण्यासाठी हलक्या वाहनांसाठी स्वतंत्र भुयारी मार्ग उभारण्याचा निर्णय घेण्यात आला आहे.
या प्रकल्पासाठी सल्लागार नेमणूक, अंदाजपत्रक तयार करणे आणि समितीकडून तत्वतः मान्यता मिळविण्यापर्यंतची प्रक्रिया पूर्ण झाली आहे. २०२५–२६ च्या अंदाजपत्रकात प्रकल्पाचा समावेश करण्यात आला असून सुमारे ४० कोटी रुपयांची प्रशासकीय मान्यता देण्यात आली आहे.
हा भुयारी मार्ग पूर्ण झाल्यास निगडी, पिंपरी, रहाटणी, काळेवाडी आणि पिंपळे सौदागर परिसरातील नागरिकांना मोठा दिलासा मिळणार असून शहराच्या वाहतूक व्यवस्थेतही सुधारणा होण्याची अपेक्षा व्यक्त केली जात आहे. या वेळी सामाजिक कार्यकर्ते सतीश गावडे, राकेश मोरे आणि सतीश लांडगे उपस्थित होते.
