पिंपरी चिंचवड, दि. १७ जून २०२५ – शहरात पोलीस आयुक्तालय आणि महापालिकेद्वारे निर्माण करण्यात आलेल्या विविध सेवा-सुविधा व विकासकामांचा लोकार्पण व भूमिपूजन सोहळा उद्या बुधवारी दि.१८ जून रोजी महाराष्ट्राचे मुख्यमंत्री देवेंद्र फडणवीस यांच्या हस्ते संपन्न होणार आहे.
संतश्रेष्ठ ज्ञानेश्वर महाराज व संत नामदेव महाराज यांचे भव्य शिल्प व संतशिल्प सृष्टी या प्रकल्पाचे वडमुखवाडी, थोरल्या पादुका आळंदी येथे तसेच संतपीठ चिखली येथे लोकार्पण सोहळा संपन्न होणार आहे. चिखली टाऊन हॉल येथे सकाळी १०.३० वाजता विविध विकासकामांचा लोकार्पण व भूमिपूजन सोहळा मुख्यमंत्री फडणवीस यांच्या हस्ते पार पाडणार आहे.
बुधवारी एकूण १६ विविध महत्त्वपूर्ण विकासकामे व सेवा सुविधांचे भूमिपूजन व लोकार्पण करण्यात येणार आहे. यामध्ये पोलीस आयुक्तालयाच्या वतीने विकसित करण्यात आलेल्या जेष्ठानुबंध -ज्येष्ठ नागरिकता अॅप , वाहतुक नियमांबाबत वाॅट्अॅप असलेले “ट्रॅफिक बडी” अॅप लोकार्पण, १.५ लक्ष देशी वृक्ष लागवड मोहिमेचा शुभारंभ, एम्पायर इस्टेट पुलावरून चिंचवडकडे उतरण्यासाठी व चढण्यासाठी उभारण्यात आलेले रॅम्प, रस्ते, अग्नीशमन केंद्र, मैलाशुद्धीकरण केंद्र, शाळा इमारत, क्लायबिंग भिंत, उड्डाणपूलांचे लोकार्पण अशा विविध प्रकल्पांचा यामध्ये समावेश आहे.
भारतीय जनता पार्टी पश्चिम महाराष्ट्र कार्यकारिणीची बैठक उद्या काळेवाडी येथील रागा लॉन्स या ठिकाणी पार पडणार असून या बैठकीस केंद्रीय मंत्री मुरलीधर मोहोळ, राज्याचे उच्च व तंत्र शिक्षण मंत्री चंद्रकांत दादा पाटील यांच्यासह पश्चिम महाराष्ट्रातील विविध जिल्ह्यातील पदाधिकारी उपस्थित राहणार आहेत. – शत्रुघ्न काटे (शहर अध्यक्ष, भारतीय जनता पार्टी, पिंपरी चिंचवड शहर -जिल्हा)
