निगडी,२३ जून २०२५ :पिंपरी चिंचवड महापालिकेच्या वतीने भारतरत्न पंडित भीमसेन जोशी संगीत अकादमी वर्धापन दिन महोत्सव २५ आणि २६ जून २०२५ रोजी आकुर्डी प्राधिकरण येथील ग. दि. माडगुळकर सभागृह येथे होणार आहे. या दोन दिवसीय महोत्सवात नामवंत गायकांचे गायन कार्यक्रम होणार आहेत. या विशेष कार्यक्रमासाठी सर्वांना मोफत प्रवेश दिला जाणार आहे, याचा जास्तीत जास्त नागरिकांनी लाभ घ्यावा असे आवाहन आयुक्त तथा प्रशासक शेखर सिंह यांनी केले आहे.
२५ जून (बुधवार) रोजी सायंकाळी ६ वाजता जेष्ठ तबला वादक पद्मश्री पंडित सुरेश तळवलकर यांच्या ‘तालयात्रा’ या विशेष कार्यक्रमाने महोत्सवाची सुरुवात होईल. त्यानंतर सायंकाळी ७.३० वाजता सुप्रसिद्ध शास्त्रीय गायिका पद्मश्री पद्मजा फेणाणी जोगळेकर यांचा ‘मंगलदीप’ हा कार्यक्रम होईल.
२६ जून (गुरुवार) रोजी अकादमी विद्यार्थ्यांचे सादरीकरण सायंकाळी ५.३० पासून सुरू होईल. गायक रामेश्वर डांगे व गायिका श्रीमती स्मिता देशमुख यांचे शास्त्रीय गायन तर गायक मिलिंद दलाल यांच्या सुगम गायनाचा कार्यक्रम होईल. त्यानंतर सायंकाळी ७.३० वाजता प्रसिद्ध गायिका विदुषी आरती अंकलीकर टिकेकर यांच्या शास्त्रीय गायनाने या महोत्सवाची सांगता होणार आहे.
महापालिकेच्या माध्यमातून अशा प्रकारचे दर्जेदार कार्यक्रम आयोजित करून तरुण पिढीला शास्त्रीय संगीताची ओळख करून देण्याचा उद्देश असून जास्तीत जास्त संगीत प्रेमींनी या कार्यक्रमांचा आनंद घ्यावा.
– विजयकुमार खोराटे, अतिरिक्त आयुक्त, पिंपरी चिंचवड महापालिका
भारतरत्न पंडित भीमसेन जोशी संगीत अकादमीचा वर्धापन दिन महोत्सव हा संगीत रसिकांसाठी मोठा सांस्कृतिक आनंद सोहळा आहे. संगीत क्षेत्रात शहराची एक वेगळी ओळख करून देण्यासाठी हा महोत्सव उपयुक्त ठरेल
– पंकज पाटील, उपायुक्त, पिंपरी चिंचवड महापालिका
संगीत ही भावनांची अभिव्यक्ती असून, तिच्या माध्यमातून मनाशी नातं जोडलं जातं. महापालिकेच्या संगीत अकादमीच्या वर्धापन दिन कार्यक्रमात सहभागी होऊन या सांगीतिक प्रवासात सहभागी व्हा. आपल्या कार्यक्रमाची शोभा वाढेल. हे सुरेल क्षण आपण सर्वांनी एकत्र अनुभवावेत, हीच नम्र विनंती.
समीर सूर्यवंशी, समन्वयक,भारतरत्न पंडित भीमसेन जोशी संगीत अकादमी
