पिंपरी – महाराष्ट्र शासनाच्या मराठी भाषा विभागाच्या निर्देशानुसार, ३ ऑक्टोबर २०२५ रोजी ‘अभिजात मराठी भाषा दिन’ तर ३ ऑक्टोबर ते ९ ऑक्टोबर या कालावधीत ‘अभिजात मराठी भाषा सप्ताह’ उत्साहात साजरा करण्यात येणार आहे. या पार्श्वभूमीवर पिंपरी चिंचवड महापालिका हद्दीत मराठी भाषेचा प्रचार, प्रसार व संवर्धनासाठी विविध उपक्रम राबविण्याचे नियोजन करण्यात आले आहे.
या संदर्भात विचारविनिमय करण्यासाठी मराठी भाषेच्या जतन व संवर्धनासाठी कार्यरत संस्था व संघटनांचे पदाधिकारी आणि प्रतिनिधी यांची बैठक सोमवारी, ११ ऑगस्ट रोजी दुपारी ३ वाजता होणार आहे. ही बैठक अतिरिक्त आयुक्त तृप्ती सांडभोर यांच्या अध्यक्षतेखाली पिंपरी येथील महापालिकेच्या मुख्य प्रशासकीय इमारतीतील तिसऱ्या मजल्यावरील ‘दिवंगत महापौर मधुकर पवळे सभागृह’ येथे होईल, अशी माहिती विशेष अधिकारी व मराठी भाषा समन्वय अधिकारी किरण गायकवाड यांनी दिली.
‘अभिजात मराठी भाषा दिन’ आणि ‘सप्ताह’ दरम्यान शासनाच्या मार्गदर्शक सूचनांनुसार तज्ज्ञ व्याख्याने, चर्चासत्रे, परिसंवाद, कार्यशाळा, शिबिरे, तसेच अभिजात मराठी ग्रंथ व साहित्यांचे प्रदर्शन आयोजित करण्यात येईल. यामध्ये प्राचीन ग्रंथांच्या समकालीन मराठीत अनुवादित आवृत्तींची विक्री, शालेय व महाविद्यालयीन स्तरावर प्रश्नमंजुषा, निबंधलेखन व वकृत्व स्पर्धा तसेच नाविन्यपूर्ण उपक्रमांचाही समावेश असेल.
या सर्व उपक्रमांच्या अंमलबजावणीसाठीचे नियोजन व तयारीवर सविस्तर चर्चा ११ ऑगस्टच्या बैठकीत होणार असून, मराठी भाषेच्या जतनासाठी कार्यरत सर्व संस्था, साहित्यिक, पदाधिकारी आणि मराठीप्रेमींनी या बैठकीस उपस्थित राहावे, असे आवाहन किरण गायकवाड यांनी केले आहे.
