पिंपळे सौदागर : नवरात्री उत्सवाच्या निमित्ताने नवनाथ मित्र मंडळाने यंदा तुळजापूरच्या तुळजाभवानी मंदिराची भव्य प्रतिकृती साकारली असून दर्शनासाठी भाविकांची मोठी गर्दी होत आहे. “मातेचं दर्शन मिळणं ही आमच्यासाठी भाग्याची गोष्ट आहे. यावर्षी तुळजापूरची माया आपल्या गावी अनुभवता येते, हे आमचे सौभाग्य आहे,” अशी भावना अनेक भाविकांनी व्यक्त केली.
माजी विरोधी पक्षनेते नाना काटे यांच्या मार्गदर्शनाखाली आणि मंडळाचे अध्यक्ष उमेश काटे यांच्या नेतृत्वाखाली हा सोहळा दिमाखात पार पडत आहे. याआधी २२ सप्टेंबर रोजी ग्रामदैवत ज्योतीबाच्या साक्षीने, ढोल-ताशांच्या गजरात,भगव्या पताका आकाशी फडकवत व भंडाऱ्याची उधळण करीत भव्यदिव्य मिरवणुकीत “सौदागरच्या माऊलीचे आगमन” झाले. २ ऑक्टोबर पर्यंत हा उत्सवधार्मिक-सांस्कृतिक कार्यक्रमांनी रंगणार आहे.
दरवर्षीप्रमाणे यंदाही मंडळाने सामाजिक, सांस्कृतिक आणि धार्मिक कार्यक्रमांची मेजवानी उत्सवाच्या निमित्ताने ठेवली आहे. तुळजाभवानी मातेच्या सहवासाने पिंपळे सौदागर व रहाटणी परिसर उत्साह आणि आध्यात्मिकतेने न्हाऊन निघाला आहे.
मंडळाचे अध्यक्ष उमेश काटे म्हणाले,
“नवरात्री हा फक्त उत्सव नसून भक्ती, श्रद्धा आणि सामाजिक एकतेचा संदेश देणारा सोहळा आहे. तुळजाभवानी मातेची प्रतिकृती उभारून भाविकांना आपल्या गावातच दर्शन घेण्याची संधी मिळते, हे आमच्यासाठी अभिमानाची बाब आहे. विशेष म्हणजे हा उत्सव महिलाशक्तीच्या प्रेरणेवर आधारित आहे. नवरात्री ही ‘नारीशक्ती’ची पूजा आहे, आणि या माध्यमातून आम्ही महिला सक्षमीकरणाचा संदेश देत आहोत. समाजातील स्त्रिया आत्मनिर्भर आणि प्रगतीशील झाल्या तर खरी शक्ती निर्माण होते. भविष्यातही अशाच पद्धतीने सांस्कृतिक वारसा जपत सामाजिक उपक्रम राबवण्याचे आमचे ध्येय आहे.”
पिंपळे सौदागरात सुरू असलेल्या या नवरात्री उत्सवात तुळजाभवानी मातेचे हजारो भाविक दररोज दर्शन घेत असून मंदिराचा “राजे शहाजी मल्हार” प्रवेशद्वार भाविकांच्या आकर्षणाचा विषय ठरला आहे. या प्रवेशद्वारावर भाविकांना सेल्फी काढण्याचा मोह आवरत नसल्याचे चित्र पाहायला मिळते आहे. त्यामुळे परिसरात भक्तीभाव आणि सांस्कृतिक जल्लोषाचे अनोखे वातावरण पाहायला मिळत आहे. तुळजाभवानी मंदिराची भव्य प्रतिकृती पाहण्यासाठी मोठ्या प्रमाणात भाविक येत असल्याने भाविकांसाठी भव्य वाहन पार्किंग व्यवस्था करण्यात आल्याची माहिती उमेश काटे यांनी यावेळी दिली आहे.
दरम्यान, पिंपळे सौदागर स्पोर्ट अँड कल्चरल ऑर्गनायझेशन (PLESCO) च्या वतीने भव्य रास-डांडिया नाईट्स ४.o चे आयोजन २६, २७ आणि २८ सप्टेंबर रोजी पिंपळे सौदागर येथील बाळासाहेब कुंजीर क्रीडांगणावर सायंकाळी ६ वाजता करण्यात आले आहे. दांडियाच्या अनोख्या अविष्कारात सहभागी होण्यासाठी “प्लेस्को” चे संस्थापक अध्यक्ष उमेश काटे यांच्या कार्यालयात नोंदणी सुरू असून सर्वांसाठी मोफत पास उपलब्ध करून देण्यात आले आहेत. नागरिकांनी वेळेत नोंदणी करण्याचे आवाहन PLESCO च्या वतीने करण्यात आले आहे.
