पिंपरी, नवरात्र उत्सवानिमित्त पिंपरी चिंचवड महानगरपालिका दिव्यांग भवन फाऊंडेशन आणि घरकुल अपंग सहाय्य संस्था यांच्या संयुक्त विद्यमाने दिव्यांग बांधवांसाठी विविध स्पर्धांचे आयोजन करण्यात आले आहे. या उपक्रमातून दिव्यांग बांधवांमध्ये कला, आत्मविश्वास व सामाजिक सहभाग वाढविण्याचा प्रयत्न होणार आहे.
कार्यक्रमांतर्गत आज, शुक्रवार दि. २६ सप्टेंबर रोजी दिवसभर मोरवाडी, पिंपरी येथील दिव्यांग भवन फाऊंडेशनमध्ये स्पर्धा पार पडणार आहेत.
स्पर्धांचे तपशील असे :
- चित्रकला रंगभरण स्पर्धा : सकाळी १०.४५ ते १२.०० या वेळेत लहान दिव्यांग मुलांसाठी (वय ३ ते १८ वर्षे). आवश्यक साहित्य आयोजकांच्या वतीने दिले जाणार आहे.
- मंडला प्रशिक्षण कार्यशाळा : दुपारी १२.३० ते २.०० या वेळेत सर्व वयोगटातील सहभागींना खुली. सहभागीनी पेन्सिल, खोडरबर व कर्कटक सोबत आणणे आवश्यक.
- रांगोळी स्पर्धा : दुपारी ३.०० ते ५.०० या वेळेत दिव्यांग महिलांसाठी (१५ वर्षांवरील). रंग व साहित्याची व्यवस्था आयोजकांकडून केली जाईल.
आयोजकांनी माहिती दिली की, हा कार्यक्रम पूर्ण दिवसाचा असल्याने उपस्थितांनी स्वतःचे जेवण आणावे. स्पर्धेत सहभागी होण्यासाठी इच्छुकांनी नाव नोंदणी व अधिक माहितीसाठी ७०५८२८२८९० या क्रमांकावर सकाळी १०.३० ते सायंकाळी ५.०० या वेळेत संपर्क साधावा.
दिव्यांग बांधवांमध्ये सुप्त कलागुणांना प्रोत्साहन मिळावे आणि उत्सवात त्यांचा सहभाग वाढावा यासाठी नागरिकांनी मोठ्या संख्येने या उपक्रमात सहभागी व्हावे, असे आवाहन आयोजकांनी केले आहे.
