थेरगाव – नवरात्रीचे रंग शहरभर दरवळत असताना थेरगावात करिश्मा बारणे यांच्या आयोजनाखाली सुरू असलेल्या दांडिया व रास-गरबा नाईट्सला तरुणाईकडून उत्स्फूर्त प्रतिसाद मिळत आहे. पारंपरिक पोशाखात सजून आलेल्या तरुण-तरुणींनी सादर केलेल्या दांडियाविष्काराने परिसरात उत्सवपूर्ण वातावरण निर्माण झाले.
२२सप्टेंबर ते २ ऑक्टोबर दरम्यान कै. मोरे महादु बारणे क्रीडांगण, वनदेव नगर थेरगाव येथे या उत्सवाचे आयोजन करण्यात आले आहे. प्रत्येक रात्रीच्या कार्यक्रमांना वाढता प्रतिसाद मिळत असून पारंपरिक रास-गरब्याच्या तालावर थिरकताना सहभागींच्या चेहऱ्यावर आनंद झळकत आहे.
उत्सवाचे आणखी एक वैशिष्ट्य म्हणजे दररोज होणारी बक्षिसांची लयलूट. उत्कृष्ट जोडी, वेशभूषा, मुलगा व मुलगी या गटांमध्ये विजेत्यांना मोबाईल फोन, पैठणी, स्मार्टवॉच, हेडफोन्स आणि लहान मुलांसाठी आकर्षक दांडिया आदी बक्षिसे देण्यात येत आहेत. त्यामुळे सहभागींचा उत्साह आणखी वाढला आहे.
करिश्मा बारणे म्हणाल्या, “नवरात्री हा फक्त नृत्याचा नाही तर एकात्मतेचा आणि संस्कृती जपण्याचा उत्सव आहे. या कार्यक्रमांमधून तरुणाईला आपली कला सादर करण्याबरोबरच परंपरा जपण्याची संधी मिळते.”
या सोहळ्यात कुटुंबे, महिला आणि तरुणाई यांचा मोठ्या प्रमाणात सहभाग दिसून आला. पैठणी विजेत्या एका स्पर्धकाने भावना व्यक्त करताना सांगितले, “करिश्माताईंनी आयोजित केलेला दांडिया उत्सव हा परिसरातील माता-भगिनींसाठी आनंद व्यक्त करण्याची संधी आहे. सुरक्षित व सात्विक वातावरणात सांस्कृतिक संवर्धन करणारा हा उपक्रम खरोखर कौतुकास्पद आहे.”
उत्सव स्थळी आकर्षक विद्युत रोषणाई, साऊंड सिस्टीम, प्रशस्त रंगमंच, स्वच्छ्तागृह, सुसज्ज पार्किंग यांची व्यवस्था करण्यात आली आहे. तसेच अखिल थेरगाव नवरात्री उत्सव समितीचे स्वयंसेवक व पोलीस प्रशासनाचे अधिकारी सुरक्षा व मदतीसाठी तैनात असल्याचे मंडळ अध्यक्ष व भाजपा नेते सनीदादा बारणे यांनी सांगितले.
थेरगावातील हा नवरात्री उत्सव केवळ मनोरंजनापुरता मर्यादित न राहता सांस्कृतिक जडणघडणीचा सोहळा ठरत आहे.
