काळेवाडी, भाजपमध्ये नव्याने प्रवेश केलेल्या इतर पक्षातील नेतेमंडळींमुळे एकीकडे शहराच्या विविध प्रभागातील भाजप कार्यकर्त्यांमध्ये असंतोषाचे वातावरण पसरलेले असताना दुसरीकडे काळेवाडी प्रभाग क्र. २२मध्ये मात्र वेगळे चित्र पाहायला मिळत आहे. राष्ट्रवादी काँग्रेसचे माजी नगरसेवक विनोद नढे यांच्या भाजप प्रवेशाचे काळेवाडीतील सर्वच भाजप पदाधिकारी आणि कार्यकर्त्यांनी जल्लोषात स्वागत केले आहे.
शनिवारी (दि. २० डिसेंबर) मुंबई येथे झालेल्या जाहीर कार्यक्रमात भाजपचे प्रदेशाध्यक्ष रविंद्र चव्हाण यांच्या उपस्थितीत विनोद नढे यांनी भाजपचा भगवा पताका खांद्यावर घेतला. त्यानंतर लगेच काल (रविवारी) सायंकाळी त्यांच्या प्रचाराचा शुभारंभ पंचनाथ चौक येथून करण्यात आला. या प्रचार
रॅलीत काळेवाडी प्रभागातील भारतीय जनता पक्षाचे सर्वच आजी-माजी पदाधिकारी व कार्यकर्त्यांनी हजेरी लावली होती. विशेष म्हणजे यामध्ये भाजपकडून काळेवाडी प्रभागातून निवडणूक लढण्यास इच्छुक असणारे उमेदवारही आवर्जून उपस्थित होते. त्यामुळे विनोद नढे यांच्या भाजप प्रवेशामुळे पक्षाला ताकद मिळाल्याची भावना कार्यकर्त्यांमधून
व्यक्त केली जात आहे.
या प्रचार रॅलीत माजी नगरसेवक सुरेश नढे पाटील, जिल्हा नियोजन समिती सदस्य काळूराम नढे, माजी नगरसेवक प्रमोद ताम्हणकर, विनोद तापकीर, विजय सुतार, सोमनाथ तापकीर या इच्छुकांनी हजेरी लावली होती. त्यामुळे विनोद नढे यांच्या प्रवेशाला पक्षातून कोणताही विरोध नसल्याचे दिसून येत आहे.
दरम्यान, मागील 9 वर्षांपासून एकाच पक्षात काम केलेल्या सहकाऱ्यांविरोधात विनोद नढे आता उभे ठाकणार आहेत. त्यामुळे ही लढत निश्चितच अटीतटीची व संपूर्ण शहराचे लक्ष वेधणारी ठरेल यात शंका नाही. नढे यांनी घेतलेला भाजप प्रवेशाचा निर्णय भाजपसाठी फायद्याचा ठरणार का? याचे उत्तर या महिन्याभरात पाहायला मिळेल.
