पिंपरी, पिंपरी चिंचवड महापालिका सार्वत्रिक निवडणुकीच्या पार्श्वभूमीवर आचारसंहितेचा उत्तरार्ध सुरू असताना प्रभाग क्रमांक ९ मधील राजकीय वातावरण अधिकच चैतन्यमय झाले आहे. या प्रभागातून राष्ट्रवादी काँग्रेस पक्षाच्या वतीने निवडणूक लढवणारे अधिकृत उमेदवार डॉ. वैशाली घोडेकर, सारिका मासुळकर, राहुल भोसले आणि सिद्धार्थ बनसोडे यांच्या प्रचाराला नागरिकांकडून मोठ्या प्रमाणात प्रतिसाद मिळत असून राष्ट्रवादी पॅनलने प्रचारात स्पष्ट आघाडी घेतल्याचे चित्र दिसून येत आहे.
प्रभागातील विविध भागांत घरोघरी भेटी, पदयात्रा, कॉर्नर सभा आणि थेट जनसंवाद कार्यक्रमांच्या माध्यमातून उमेदवारांनी प्रचाराला वेग दिला आहे. विशेषत: माजी महापौर हणमंत भोसले यांच्या मार्गदर्शनाखाली सुरू असलेल्या प्रचार मोहिमेत महिला, युवक आणि ज्येष्ठ नागरिक मोठ्या संख्येने सहभागी होत आहेत. प्रचारासाठी स्थानिक नागरिक स्वतःहून पुढे येत असल्याचे चित्र दिसून येत असून, याउलट विरोधी उमेदवारांना इतर प्रभागांमधून लोकांना भाड्याने आणावे लागत असल्याची चर्चा नागरिकांमध्ये होत आहे.
राष्ट्रवादी पॅनलचे उमेदवार नागरिकांच्या दैनंदिन जीवनाशी निगडित प्रश्नांना प्राधान्य देत आहेत. पाणीपुरवठा, रस्ते, ड्रेनेज, स्वच्छता, आरोग्य व शिक्षण सुविधा, तसेच मजबूत पायाभूत सुविधांचा विकास हे प्रचाराचे प्रमुख मुद्दे ठरत आहेत. यासोबतच सर्वसमावेशक समाजनिर्मिती, महिला सक्षमीकरण आणि युवकांसाठी रोजगार व संधी निर्माण करण्याचा ठाम निर्धार उमेदवारांनी व्यक्त केला आहे.
प्रभागातील नागरिकांकडून मिळणारा वाढता पाठिंबा पाहता राष्ट्रवादी काँग्रेसचा पॅनल अधिक मजबूत होत असल्याचे चित्र स्पष्ट आहे. राजकीय निरीक्षकांच्या मते, प्रभाग क्रमांक ९ मध्ये राष्ट्रवादी काँग्रेस पक्षाचे पारडे जड राहण्याची दाट शक्यता असून आगामी मतदान अधिक रंगतदार ठरण्याची चिन्हे दिसत आहेत.
