मुंबई दि.१५ जून २०२५: राज्यातील शाळकरी विद्यार्थ्यांसाठी सुखद बातमी आहे. येत्या १६ जून २०२५ पासून एसटी बसचा मासिक पास थेट विद्यार्थ्यांच्या शाळेतच उपलब्ध होणार आहे. परिवहन मंत्री प्रताप सरनाईक यांनी या उपक्रमाची घोषणा करताना सांगितले की, “एसटी पास थेट तुमच्या शाळेत” या मोहिमेची अंमलबजावणी नव्या शैक्षणिक वर्षाच्या सुरुवातीलाच होणार आहे.
आत्तापर्यंत विद्यार्थ्यांना पास मिळवण्यासाठी स्थानिक एसटी डेपोपर्यंत जावे लागत होते, त्यामुळे वेळ आणि श्रम खर्च होत होते. आता मात्र एसटी महामंडळाचे कर्मचारी थेट शाळेत जाऊन पास वाटप करतील. यासाठी शाळांनी विद्यार्थ्यांची यादी आधीच तयार ठेवावी, असे आवाहन करण्यात आले आहे.
सरनाईक यांनी सांगितले की, विद्यार्थ्यांना एसटी प्रवासासाठी ६६.६६% इतकी सवलत दिली जाते आणि उर्वरित फक्त ३३.३३% रक्कम भरून त्यांना मासिक पास मिळतो. विशेष म्हणजे, “पुण्यश्लोक अहिल्याबाई होळकर” योजनेतर्गत बारावीपर्यंतच्या विद्यार्थिनींना मोफत पास देण्यात येतो.
या नवीन व्यवस्थेमुळे विद्यार्थ्यांना रांगेत उभं राहावं लागणार नाही, वेळेवर शाळेत पोहोचता येईल आणि शिक्षणात व्यत्यय येणार नाही. यामुळे पालक आणि विद्यार्थी दोघेही समाधानी आहेत. शिक्षण विभागानेही या उपक्रमाचे स्वागत केले असून, विद्यार्थ्यांची उपस्थिती वाढण्यास ही योजना उपयोगी ठरेल, असा विश्वास व्यक्त केला जात आहे.
या निर्णयामुळे राज्यातील लाखो विद्यार्थ्यांना दिलासा मिळणार आहे आणि शालेय जीवन अधिक सुलभ होणार आहे.
