पिंपरी चिंचवड महानगरपालिका सार्वत्रिक निवडणुकीच्या पार्श्वभूमीवर प्रभाग क्रमांक २१ मधून राष्ट्रवादी काँग्रेस पक्षाकडून निवडणूक रिंगणात उतरलेल्या माजी नगरसेवक संदीप वाघेरे, ढब्बू असवाणी, निकिता कदम आणि प्रियांका कुदळे यांच्या उमेदवारी अर्जांची निवडणूक निर्णय अधिकाऱ्यांकडून छाननी करण्यात आली. या छाननीअंती चारही उमेदवारांचे अर्ज वैध ठरविण्यात आले.
अर्ज वैध ठरल्यानंतर प्रभागात कार्यकर्ते व समर्थकांमध्ये उत्साहाचे वातावरण निर्माण झाले असून, प्रचाराला आता अधिक वेग येण्याची चिन्हे दिसत आहेत. प्रभाग क्रमांक २१च्या सर्वांगीण विकासासाठी कटिबद्ध असल्याचे सांगत उमेदवारांनी पाणीपुरवठा, रस्ते, आरोग्य, स्वच्छता तसेच मूलभूत नागरी सुविधांवर विशेष भर देणार असल्याची भूमिका मांडली.
जनतेशी थेट संवाद साधत त्यांच्या समस्या जाणून घेऊन प्रभावी उपाययोजना राबविण्याचा निर्धार यावेळी व्यक्त करण्यात आला. जनतेच्या विश्वासावर निवडणूक लढवत प्रभागाच्या विकासाला नवी दिशा देण्याचा संकल्प उमेदवारांनी केला असून, आगामी काळात नागरिकांच्या प्रश्नांना प्राधान्य देत जोमदार प्रचार राबविण्यात येणार असल्याचे त्यांनी स्पष्ट केले.
