पिंपरी, आगामी सार्वत्रिक निवडणुकीच्या पार्श्वभूमीवर पिंपरी चिंचवड महानगरपालिकेने जाहीर केलेल्या प्रभागनिहाय प्रारूप मतदार याद्यांमध्ये गंभीर त्रुटी असल्याचा आरोप वंचित बहुजन युवा आघाडीने केला आहे. प्रभाग क्रमांक ११ (२०७ – भोसरी विधानसभा मतदारसंघ) साठी २० नोव्हेंबर २०२५ रोजी महाराष्ट्राचे मुख्य निवडणूक अधिकारी यांनी जाहीर केलेल्या प्रारूप मतदार यादीत डुप्लिकेट नावे, तसेच मृत मतदारांची नावे अद्यापही दाखल असल्याचे निदर्शनास आघाडीने आणले आहे.
या संदर्भात आघाडीच्या प्रतिनिधींकडून विजयकुमार खोराटे, प्राधिकृत अधिकारी व अतिरिक्त आयुक्त (२), पिंपरी चिंचवड महानगरपालिका यांच्या नावे निवेदन देण्यात आले. १ जुलै २०२५ च्या अद्ययावत मतदार यादीवर आणि नव्या प्रभागरचनेवर आधारित असलेल्या प्रारूप यादीत अशा त्रुटी असणे अत्यंत चिंताजनक असून, त्यातून निवडणूक प्रक्रियेची पारदर्शकता धोक्यात येऊ शकते, असा गंभीर मुद्दा आघाडीने मांडला आहे.
दुरुस्ती करून सुधारित प्रारूप मतदार यादी तातडीने प्रसिद्ध करण्याची मागणी निवेदनात करण्यात आली आहे. वास्तविक मतदारांची अचूक संख्या स्पष्ट होणे आणि चुकीची/मृत/डुप्लिकेट नोंदी ताबडतोब हटवणे अत्यावश्यक असल्याचे आघाडीने नमूद केले.
निवेदन देताना वंचित बहुजन युवा आघाडीचे अध्यक्ष विनोद गायकवाड, उपाध्यक्षा राहुल बनसोडे, नितीन सोणवणे, सचिव शिवाजी खडसे, दिपक म्हेत्रे आदी कार्यकर्ते उपस्थित होते.
प्रभाग ११ मधील मतदार याद्यांवरील या गंभीर त्रुटींमुळे आगामी निवडणुकीपूर्वी निवडणूक विभागाकडून सखोल तपासणी आणि शुद्धीकरणाची मागणी आता जोर धरत आहे.
